Dekabrın 7-də Gəncə Ağır Cinayətlər Məhkəməsi hakim Abdulla Məmmədovun sədrliyi ilə Ermənistan hərbçisi Qaqik Voskanyanı 18 il həbsə məhkum edib.
Voskanyan bu il avqustun 16-da Azərbaycanın Ermənistanla hələ delimitasiya olunmamış şərti sərhədinin Kəlbəcər rayonu istiqamətində saxlanılıb.
Azərbaycan Müdafiə Nazirliyinin məlumatına görə, Ermənistan hərbçisi diversiya-kəşfiyyat qrupunun üzvü olub.
Ona qarşı Azərbaycan Cinayət Məcəlləsinin 206.3.2 (qaçaqmalçılıq), 214.2.1 (terrorizm) və 318.2 (sərhədi qanunsuz keçmək) maddələrilə ittihamlar irəli sürülüb.
Məhkəmə Voskanyanı ilk 5 ili qapalı həbsxanada keçirməklə 18 il müddətinə azadlıqdan məhrum edib.
Voskanyan cəzasını çəkdikdən sonra Azərbaycandan deportasiya ediləcək.
Ermənistan Voskanyanın kəşfiyyat-diversiya qrupunun üzvü olması, təxribat törətmək məqsədilə Azərbaycan sərhədini gizli keçməsi haqda iddiaları təkzib edib.
"Ehtiyatda olan hərbi qulluqçu, təlim-məşq toplanışının iştirakçısı Qaqik Voskanyan döyüş mövqeyini tərk edib. Ehtiyatda olan hərbçinin Azərbaycan tərəfinə necə düşə biləcəyi ilə bağlı mümkün ssenari və şərait öyrənilir", Ermənistan Müdafiə Nazirliyi bildirib.