Noyabrın 9-da Azərbaycanda Dövlət Bayrağı Günü qeyd olunur. Bayram münasibətilə ölkədə qeyri-iş günüdür.
Üzərində aypara və səkkiz guşəli ulduz olan üçrəngli bayraq 1918-ci l noyabrın 9-da Azərbaycan Xalq Cümhuriyyəti (1918-1920) tərəfindən dövlət rəmzi kimi təsdiq edilib.
Bu bayraq 1920-ci il aprelin 28-nə qədər qüvvədə olub, həmin tarixdə Azərbaycan bolşevik Rusiyası tərəfindən işğal edilib.
1980-ci illərin sonu - 1990-cı illərin başlanğıcında milli-azadlıq mübarizəsi nəticəsində 1991-ci il fevralın 5-də Azərbaycan Ali Soveti (parlament) üçrəngli bayrağı respublikanın rəmzi kimi bərpa edib.
Azərbaycan prezidenti İlham Əliyevin 17 noyabr 2009-cu il tarixli fərmanına uyğun olaraq noyabrın 9-u hər il "Dövlət Bayrağı Günü" kimi qeyd olunur.
2010-cu ildə Bakı buxtasının cənub-qərb sahilində bayraq dirəyinin yüksəkliyi 162 m olan Bayraq Meydanı açılıb. Orada həm də Bayraq Muzeyi yaradılıb.